Fasti Gerðarrættur heldur:

At sambært sáttmálanum um Fasta Gerðarrætt stendur í § 8, stk. 5, at í málum um óheimilað stríðsstig skal fyrireikandi fundurin vera innan 24 tímar eftir kærurit er innlatið, og úrskurðarfundur verða hildin og úrskurður sagdur innan 72 tímar. Talan er sostatt um skundmál, tá Fasti Gerðarrættur skal viðgera spurning um óheimilað stríðsstig, sum í hesum máli.

Málið snýr seg um, hvørt samhugaverkfallið er fráboðað við rættari freist sambært avtalu millum partarnar. Samhugaverkfallið hevur tilknýti til lóg, ið er samtykt í sambandi við verkfallið hjá Felagnum Føroyskir Sjúkrarøktarfrøðingar. Lógin fevnir ikki um tey fakfeløg, ið eru partur í hesum máli. Avtalan um fráboðanarfreist hevur reglur um uppsøgn. Avtalan er ikki uppsøgd. Tá talan er um, at lógin frá 2. november 2023 um at leingja sáttmálan hjá Felagnum Føroyskir Sjúkrarøktarfrøðingar og Fíggjarmálaráðið, ikki fevnir um partar í hesum máli samanhildið við, at avtalan ikki er uppsøgd eftir reglunum í avtaluni, metir Fasti Gerðarrættur, at avtalan um fráboðanarform og fráboðanarfreist er í gildi millum partarnar. Fráboðanin um samhugaverkfallið er ikki givin við freist sambært avtaluni. Fasti Gerðarrættur heldur tí, at talan er um eitt óheimilað stríðsstig.