Fasti Gerðarrættur heldur

Niðurstøða:

Reiðarafelagið fyri Handilsskip verður frídømt.

Gerðarrætturin hevur frídømt Reiðarafelagið fyri Handilsskip av hesum orsøkum:

Partarnir hava gjørt ein sersáttmála fyri limir kærarans, ið eru omborð á størri handilsskipum. Har hesar ásetingar víkja frá høvuðssáttmálalum, er tað sersáttmálin, ið er galdandi framum, jvb § 1 í sersáttmálanum.

Sambært § 4 í sersáttmálanum millum partarnar verður arbeitt eftir einari 1:1 skipan. Ferðing er íroknað frítíð, avmarkingar eru í stk. 2, har útmynstring er í mesta lagi 6 vikur umborð, og 2 dagar til ferðing báðar vegir. Sáttmálin inniheldur soleiðis 2 ferðadagar til ferðing aftur og fram, tvs. ein ferðadag út og ein ferðadag heim. Í hesum máli er talan um tann dagin, tá arbeiðstakari ferðast heim. Eftir eini orðaljóðstulking er tann dagurin, arbeiðstakari ferðast, ferðadagur. Hetta sjálvt um allur dagurin ikki verður brúktur til ferðing. Avloysingardagur og ferðadagur er sostatt sami dagur. Tá talan er um, at ferðingin er íroknað frítíðina, hevur arbeiðstakarin sambært eini orðaljóðstulking ikki rætt til frítíð umframt ferðadagin. Sáttmálin tekur hædd fyri, at støða kann íkoma, at arbeiðstakari ikki kemur heim sama dag, og ferðingin tí tekur samanlagt meira enn tveir dagar, tá verður talan um 0-dag. Sáttmálin hevur ikki ásetingar um skiftisdag. Tá talan er um 1:1 skipan samanhildið við, at sáttmálin hevur ásetingar um frítíð, ferðadag ella arbeiðsdag, er onki grundarlag í sáttmálanum at tulka ein skiftisdag inn í skipanina.

Føroya Skipara- og Navigatørfelag hevði sáttmálakrav í 2006 um, at ásetingin um, at 4 ferðadagar eru íroknaðir frítíðini átti at verða strikað og aftur í 2013 um, at ferðadagarnir í § 4 skuldu burtur.

Sambært frágreiðingunum frá stjóranum í Skansi Offshore Jens Meinhard Rasmusssen og Gunnbjørn Joensen, hevur sama skipan verið brúkt síðani byrjan, at fyrsti ferðadagur verður skrásettur sum plussdagur og avloysaradagurin verður ein minusdagur soleiðis, at samanlagt verður talan um eina útlíkning.

Orðingin í crew managager – timebalance (skjal Ld 3) um, at persónur kann bert hava ein aktivitet pr. dag, t.d. tú kanst ikki bæði verða umborð og ferðast sama dag, ella hava barsil og skeið sama dag, er av tekniskum slagi, og forðar ikki, at arbeiðstakari kann hava fleiri aktivitetir pr. dag, soleiðis at tá avloysingardagur og ferðadagur eru sama dag, verður hetta skrásett sum ferðadagur, sjálvur um arbeiðstakari veruliga hevur fleiri aktivitetir, herundir er til arbeiðis og ferðast.

Grundað á hesi viðurskifti fær Føroya Skipara- og Navigatørfelag ikki viðhald í sínum kravi.

Gerðarrætturin hevur ikki viðgjørt tær viðmerkingar, sum hava verið frammi á úrskurðarfundi um sjómanslógina, tá hetta ikki hevur verið partur av fyrireikingini av málinum.