Fasti Gerðarrættur heldur

Á dagstovnaøkinum varð í 2005 farið til at brúka námsfrøðilig tiltøk, tá børn høvdu tørv á hesum. Námsfrøðilig tiltøk vóru ein uppraðfesting av barnagarðsstovuni, ið viðkomandi barn gekk í. Yvir longri tíð hava námsfrøðilig tiltøk og stuðlar verið játtað til børn, ið hava tørv á hesum. Hetta er bæði galdandi á dagstovna- og forskúlaøkinum og í fólkaskúlanum.

Partarnir eru samdir um, at áðrenn avtaluna frá 17. juni 2015 millum partarnar, hava allir námsfrøðingar í forskúlanum verið flokkaðir sum vanligir námsfrøðingar undir § 3, litra A í sáttmálanum. Eisini er semja um, at stuðlar í fólkaskúlanum sambært § 3 Litra H ganga somu lønarstig sum vanligir námsfrøðingar sambært litra A á dagstovnaøkinum.

Fasti Gerðarrættur heldur ikki eftir teimum upplýsingum, ið eru í málinum, at siðvenja um at flokka stuðlar sambært § 3, litra H í sáttmálanum er prógvað.

Kunngerð nr. 108 frá 8. august 2013 er sett í verk við heimild í fólkaskúlalógini. Sambært Mentamálaráðnum er forskúlin partur av fólkaskúlanum.

Avtalan frá 17. juni 2015 millum Føroya Pedagogfelag og Kommunala Arbeiðsgevarafelag kemur í lag í framhaldi av, at forskúlaøkið varð skipað við kunngerð nr. 108 frá 8. august 2013. Í krøvunum í sambandi við samráðingarnar sæst, at tað vóru námsfrøðingar, ið vóru fevndir av kunngerðini, ið samráðst varð um. Tað var av týdningi, at námsfrøðingar fingu somu treytir sum lærarar, Hetta sæst aftur í avtaluni, har námsfrøðingar fáa fyrireikingartíð, men fáa ikki 6. fríviku, tá lærarar ikki hava hesa. Partarnir eru samdir um, at teir námsfrøðingar, ið eru settir til námsfrøðilig tiltøk, ikki hava verið nevndir í samband við avtaluna frá 17. juni 2015.

Av fráboðanini um arbeiðssteðg og málið í Fasta Gerðarrætti í hesum sambandi framgongur, at talan var um námsfrøðingar, sum vóru fevndir av kunngerð um skipan og læring í forskúla.

Setanir hjá forskúlanámsfrøðingum og námsfrøðingar settir til námsfrøðilig tiltøk eru ymiskar. Forskúlanámsfrøðingar verða settir í fast starv, meðan námsfrøðingar settir til námsfrøðilig tiltøk verða settir í tíðaravmarkað starv. Hetta hevur m.a. tann týdning, at námsfrøðingur settur til námsfrøðiligt tiltak ikki á sama hátt sum lærari og námsfrøðingur í forskúlanum sambært kunngerðini, kann vera við í fyrireiking o.t., tí teir ikki eru til staðar alt skúlaárið.

Hesi viðurskifti samanhildið við, at talan er um eina avtalu um serliga flokking í mun ta vanligu flokking smb. § 3, litra A, ið upprunaliga varð brúkt at flokka allar námsfrøðingar í forskúlanum, áðrenn avtalan tann 17. juni 2015 varð gjørd, heldur Fasti Gerðarrættur, at námsfrøðingar settir til námsfrøðilig tiltøk í forskúla, ikki eru fevndir av avtaluni frá 17. juni 2015 millum partarnar. Innkærdi fær tí viðhald í sínum málskravi um frídøming.