Starvsfelagið móti Fíggjarmálaráðnum

Støða
Avgreitt
Rættur
Fasti Gerðarrættur
Evni
Gerðarrættarmál (tulking o.a., s.b. FG §6(3)), Løn
Umboð
Gunn Ellefsen, Sigmund Poulsen
Partar
Fíggjarmálaráðið - FMR, Starvsfelagið - SMF
Rættarlimir
Leivur Michelsen, Niels Jørgin Nielsen, Rannvá Ragnarsdóttir
Mál
6
Ár
2021
Úrskurðardagur
24. mai 2022
Ásetingar
§ 6 (3) í Sáttmála um Fasta Gerðarrætt
Lýsing
Málið snýr seg um, at innkærdi skal viðurkenna, at limir hjá kærandi í starvið hjá Familjufyrisitingini, skulu lønast við persónligari flokking sambært lønartalvuni í galdandi sáttmála millum partarnar.
Viðgerðin
Tann 16. juli 2021 móttikið kærurit.
Tann 9. november 2021 móttikið svarrit.
Tann 10. januar 2022 móttikið replikk.
Tann 11. februar 2022 móttikið duplikk.
Tann 6. mai 2022 úrskurðarfundur.

Niðurstøða
Fasti Gerðarrættur sigur tí henda
ÚRSKURÐ

Fíggjarmálaráðið verður dømt til at viðurkenna:

- at NN í starvi sínum hjá Familjufyrisitingini – sum persónlig flokking – skal lønast sum deildarleiðari 2 á stigi 32 í lønartalvuni til galdandi sáttmála millum partarnar og
- at NN í starvi sínum hjá Familjufyrisitingini - sum persónlig flokking – skal lønast sum serfrøðingur III á stigi 40 í lønartalvuni til galdandi sáttmála millum partarnar.

Fíggjarmálaráðið verður í aðra máta frídømt.
Málkostnaður
Hvør partur ber sín kostnað.

Partarnir bera, sambært sáttmála um Fasta Gerðarrætt og reglugerð um gjøld, hvør sína helvt av málskostnaðinum eftir nærri uppgerð.
Grundgeving
Fasti Gerðarrættur heldur

Starvslýsingar og tilmæli um flokking er gjørd av stjóranum á Familjufyrisitingini sambært vegleiðing frá Fíggjarmálaráðnum um flokkingar. Sambært vegleiðingini skal avvarðandi aðalráð góðkenna stovnsbygnaðin umframt, at umsókn um flokking skal verða send til aðalstýrið, ið stovnurin hoyrir til. Sambært vegleiðingini eigur aðalstýrið at senda lønardeildini umsóknina um flokking og eitt tilmæli um flokkingina. Í málinum hevur aðalráðið ikki viðgjørt stovnsbygnað og flokking nærri, tí man ikki metir seg hava førleika til hetta.

Í fylgiskjalinum um flokkingar til sáttmálan stendur m.a., at endamálið við lønarskipanini er at tryggja eina rættvísa løn fyri øll størv, sum sáttmálin fatar um. Lønarskipanin skal tryggja, at javnstøða er millum kynini, tá ið lønin verður ásett. Tá ið størv verða flokkað, verður dentur lagdur á, at tað er greitt samband millum løn og starvsinnihald, ábyrgd og hvar tey eru í bygnaðinum. Eisini skal verða tryggjað, at líknandi størv verða flokkað á sama hátt, óansæð á hvørjum stovni tey eru.

NN
Í tilmælinum frá stjóranum verður mælt til, at starvið verður flokkað sum persónlig flokking á lønarstig 28. Tilmælið er serliga grundað á, at starvið inniber sjálvstøðugar avgerðir, avgerðirnar eru ikki øðrvísi enn tær, ið løgfrøðingarnir taka, servitan krevst, drúgvar arbeiðsroyndir innan økið og at talan er um útsett arbeiði.

Fíggjarmálaráðið hevur flokkað starvið í lønarflokk 5 á endastigi m.a. vísandi til líknandi størv hjá landinum.

Sambært upplýsingum í málinum verða skrivstovufólk vanliga flokkað í flokk III-V. Í fylgiskjalinum stendur um flokkarnar IV-V.

Flokkur IV
Yrkisútbúgving ella miðnámsskúli umframt yvirbygnað við meira enn enn einum ári og upp til tvey ár.
3 – 5 ára arbeiðsroyndir

Flokkur V
2 – 3 ára teoretisk útbúgving, aftaná miðnám- ella yrkisútbúgving. Serliga útsett størv kunnu verða flokkað í V. lønarflokki óheft av útbúgvingarkrøvum.

Starvsinnihaldið í flokki IV og V er:

Flokkur IV og V
• Fjøltáttað, sjálvstøðugt arbeiði.
• Starvsfólkið tilmælir ella tekur avgerð um hvussu ein nýggjur trupulleiki verður loystur.
• Samskipandi uppgávur.
• Taka sær av sjálvstøðugum, skikkaðum arbeiði, har treyt er viðkomandi útbúgving og royndir.
• Lítlar leiðsluuppgávur
• Sjálvstøðug saksviðgerð á øki, har treyt er stór servitan

Vísandi til fylgiskjalið til sáttmálan, serliga endamálsorðingina um at tryggja, at líknandi størv verða flokkað á sama hátt, óansæð á hvørjum stovni tey eru samanhildið við tær arbeiðsuppgávur, útbúgving og royndir, ið NN hevur, heldur Fasti Gerðarrættur, at starvið skal flokkast í lønarflokki V. Fíggjarmálaráðið verður tí frídømt fyri henda partin av málskravinum.

NN
Í tilmælinum frá stjóranum verður mælt til, at starvið verður flokkað í lønarflokki V, stig 6. Tilmælið er serliga grundað á, at NN er serliga útsett orsakað av, at hon hevur telefon og avgreiðsluna min. 50 % av tíðini og hon verður tískil útsett fyri stórum trýsti frá borgarum í gerandisdegnum.

Fíggjarmálaráðið hevur flokkað starvið í lønarflokk IV á endastigi m.a. vísandi til líknandi størv hjá landinum (Almannaverkinum).

Sambært upplýsingum í málinum verða skrivstovufólk vanliga flokkað í flokk III-V. Journalførari á Almannaverkinum er flokkaður í flokki IV. Í fylgiskjalinum stendur um flokkarnar IV-V.

Flokkur IV
Yrkisútbúgving ella miðnámsskúli umframt yvirbygnað við meira enn einum ári og upp til tvey ár.
3 – 5 ára arbeiðsroyndir

Flokkur V
2 – 3 ára teoretisk útbúgving, aftaná miðnám- ella yrkisútbúgving. Serliga útsett størv kunnu verða flokkað í V. lønarflokki óheft av útbúgvingarkrøvum.

Starvsinnihaldið í flokki IV og V er:

Flokkur IV og V
• Fjøltáttað, sjálvstøðugt arbeiði.
• Starvsfólkið tilmælir ella tekur avgerð um hvussu ein nýggjur trupulleiki verður loystur.
• Samskipandi uppgávur.
• Taka sær av sjálvstøðugum, skikkaðum arbeiði, har treyt er viðkomandi útbúgving og royndir.
• Lítlar leiðsluuppgávur
• Sjálvstøðug saksviðgerð á øki, har treyt er stór servitan

Vísandi til fylgiskjalið til sáttmálan, serliga endamálsorðingina um at tryggja, at líknandi størv verða flokkað á sama hátt, óansæð á hvørjum stovni tey eru samanhildið við tær arbeiðsuppgávur, útbúgving og royndir, ið NN hevur, heldur Fasti Gerðarrættur, at starvið skal flokkast í lønarflokki IV. Fasti Gerðarrættur heldur ikki eftir teimum upplýsingum, ið eru komnar fram í málinum, at starvið er meira útsett enn onnur størv, ið kunnu samanberast við. Fíggjarmálaráðið verður tí frídømt fyri henda partin av málskravinum.

NN
Í tilmælinum frá stjóranum verður mælt til, at starvið verður flokkað sum deildarleiðari 2, stig 32. Tilmælið er serliga grundað á, at NN í roynd og veru hevur leiðsluábyrgd á barnagjaldsøkinum, hon tekur ikki øðrvísi avgerðir enn løgfrøðingar, hevur servitan, drúgvar arbeiðsroyndir innan økið og sera viðkomandi fakligar førleikar, ábyrgd av innanhýsis verkætlan, ráðgevur og ger tilmæli til leiðsluna um gjaldsøkið, hevur útsett arbeiðið, umframt at tað ber ikki til at seta nakran í hennara stað, tí ongin er, ið hevur hennara førleikar og tískil er Familjufyrisitingin sera bundin at hennara vitan.

Sambært frágreiðing hjá Súna Selfoss er NN í farloyvi í starvinum og tá lýst varð eftir starvsfólki til hennara starv, varð lýst eftir løgfrøðingi.

Fíggjarmálaráðið hevur flokkað starvið sum serfrøðing 2 í lønarflokki 8, stig 6 m.a. vísandi til uppgávur og líknandi størv hjá landinum.

Í fylgiskjalinum stendur um serfrøðingar og deildarleiðarar:

5. Serfrøðingar
Trý sløg av serfrøðingastørvum verða skipað: Serfrøðingur I, II og III. Tá ið serfrøðingastørv verða skipað, eru formlig krøv um starvsaldur:
Fyri at verða útnevndur til serfrøðing I, skal starvsfólkið hava minst 3 ára starvsroyndir í relevantum starvi ella samsvarandi eftirútbúgving/dupultútbúgving. Serfrøðingur I er flokkaður í lønarflokki 7.
Fyri at verða útnevndur til serfrøðing II, skal starvsfólkið hava minst 5 ára starvsroyndir í relevantum starvi ella samsvarandi eftirútbúgving/dupultútbúgving. Serfrøðingur II er flokkaður í lønarflokki 8.
Fyri at verða útnevndur til serfrøðing III, skal starvsfólkið hava minst 7 ára starvsroyndir í relevantum starvi ella samsvarandi eftirútbúgving/dupultútbúgving. Serfrøðingur III gongur lønarstigini 34-40.
Umframt tey formligu krøvini, verður eisini kravt, at serfrøðingavitan er kravd fyri at røkja starvið og at starvsfólkið hevur servitan á høgum fakligum stigi.
Sum dømi um tættir, sum dentur verður lagdur á, tá ið serfrøðingastørv verða flokkað, kunnu verða nevnd:
Servitan á høgum fakligum stigi
Røkir serliga arbeiðsuppgávur á høgum førleikastigi
Ofta tvørgangandi uppgávur, t.d. leiðari fyri verkætlanum
Sjálvstøðuga fakliga leiðslu av einum ikki ótýðandi øki
Leiðsluligar uppgávur, m.a. ráðgeva leiðsluni og gera menningaruppgávur og frágreiðingar fyri leiðsluna
Ofta er beinleiðis starvsfólkaleiðsla bara ein smávegis partur av arbeiðinum.
7. Leiðsla.
Deildarleiðarar eru í trimum flokkum:
Deildarleiðari 1, gongur lønarstigini 21-26
Deildarleiðari 2, gongur lønarstigini 27-33
Deildarleiðari 3, gongur lønarstigini 34-40, leiðir tungar deildir við starvsfólki í bólki VII ella BA-stiganum, t.e. m.o. fjølmiðlafólk og sosialráðgevar.

Viðurskifti, ið hava týdning, tá ið støða skal verða tikin til, um eitt starv er leiðarastarv, eru:
• Innihaldið og ábyrgdarstigið í starvinum
• Ábygdarøkið
• Vavið og slagið av arbeiðsleiðslu
• Líknandi størv

Sambært skrivinum frá stjóranum á Familjufyrisitingini fer umleið 40-50% av arbeiðstíðini hjá NN til uppgávur, ið ikki fevna um leiðslu. Tá talan er um leiðsluuppgávur skrivar stjórin m.a., at NN hevur ábyrgd av øllum avgerðunum, ið verða tiknar á stovninum innanfyri hennara starvsøkið, hon gjøgnumgongur avgerðir hjá hinum báðum skrivstovufólkunum og vegleiðir í samband við málsviðgerð á barnagjaldsøkinum v.m., hon hevur ábyrgd av at gera standardskriv á økinum, og hevur vikuliga fakligar fundir við skrivstovufólkini. Umframt hetta hevur hon, í sambandi við yvirtøkuna av familjurættinum saman við leiðsluni, verið til fundir við eksternar myndugleikar fyri at skipa arbeiðið á Familjufyrisitinigini eftir yvirtøkuna, og er við í samstarvi um nýggja talgilda samleikan. Í skrivinum verður eisini upplýst frá stjóranum, at NN í roynd og veru hevur leiðsluábyrgd á barnagjaldsøkinum og hon virkar sum deildarleiðari innan gjaldsøkið.

Vísandi til hesi viðurskifti samanhildið við tey viðurskifti, ið sambært flokkingaryvirlitinum hava týdning fyri flokking av leiðarastørvum, heldur Fasti Gerðarrættur, at talan er um starv, sum skal flokkast sum deildarleiðari 2, stig 32. Hetta sjálvt um organisatiónsdiagrammið fyri Familjufyrisitingina ikki vísir eina deild innan gjaldsøkið. Starvsfelagið fær tí viðhald í hesum parti av sínum málskravi.

NN
Í tilmælinum frá stjóranum verður mælt til, at starvið verður flokkað sum serfrøðingur III, stig 40. Tilmælið er serliga grundað á, at NN í roynd og veru hevur sjálvstøðuga fakliga leiðslu av tí barnaserkøna økinum, hevur servitan, drúgvar arbeiðsroyndir innan økið og sera viðkomandi fakligar førleikar, ábyrgd av at menna nýggj tilboð og leistir í barnaserkønum regi, ráðgevur og ger tilmæli til leiðsluna og at talan er um útsett arbeiði.

Fíggjarmálaráðið hevur flokkað starvið í BA-stigan á endastigi m.a. vísandi til líknandi størv hjá landinum.

Í fylgiskjalinum til sáttmálan stendur um serfrøðingar og BA-stigan stendur:

5. Serfrøðingar
Trý sløg av serfrøðingastørvum verða skipað: Serfrøðingur I, II og III. Tá ið serfrøðingastørv verða skipað, eru formlig krøv um starvsaldur:
Fyri at verða útnevndur til serfrøðing I, skal starvsfólkið hava minst 3 ára starvsroyndir í relevantum starvi ella samsvarandi eftirútbúgving/dupultútbúgving. Serfrøðingur I er flokkaður í lønarflokki 7.
Fyri at verða útnevndur til serfrøðing II, skal starvsfólkið hava minst 5 ára starvsroyndir í relevantum starvi ella samsvarandi eftirútbúgving/dupultútbúgving. Serfrøðingur II er flokkaður í lønarflokki 8.
Fyri at verða útnevndur til serfrøðing III, skal starvsfólkið hava minst 7 ára starvsroyndir í relevantum starvi ella samsvarandi eftirútbúgving/dupultútbúgving. Serfrøðingur III gongur lønarstigini 34-40.
Umframt tey formligu krøvini, verður eisini kravt, at serfrøðingavitan er kravd fyri at røkja starvið og at starvsfólkið hevur servitan á høgum fakligum stigi.
Sum dømi um tættir, sum dentur verður lagdur á, tá ið serfrøðingastørv verða flokkað, kunnu verða nevnd:
Servitan á høgum fakligum stigi
Røkir serliga arbeiðsuppgávur á høgum førleikastigi
Ofta tvørgangandi uppgávur, t.d. leiðari fyri verkætlanum
Sjálvstøðuga fakliga leiðslu av einum ikki ótýðandi øki
Leiðsluligar uppgávur, m.a. ráðgeva leiðsluni og gera menningaruppgávur og frágreiðingar fyri leiðsluna
Ofta er beinleiðis starvsfólkaleiðsla bara ein smávegis partur av arbeiðinum.

6. Miðallangar útbúgvingar
Galdandi frá 1. oktober 2019: Bachelorar ganga stigini: 17, 18, 19, 20, 21, 23, 25, 27
Flokkingin er ætlað útbúgvingar á støði við professiónsbachelor, ið hoyra til sáttmálaøkið hjá Starvsmannafelagnum. Hetta eru t.d journalistar, sosialráðgevarar, bókavørðar o.o., sum í dag eru flokkað sum professiónsbachelorar.
Skulu aðrar útbúgvingar á hesum útbúgvingarstøði verða umfataðar av hesi flokking, skal tað avtalast sáttmálapartarnar ímillum.
Treyt fyri at verða umfataður av hesi flokking er somuleiðis, at starvsinnihaldið krevur nevndu útbúgvingar.

Vísandi til tilmælið frá stjóranum á Familjufyrisitingini samanhildið við teir tættir, dentur skal leggjast á, tá serfrøðingastørv verða flokkað, og at sosialráðgevi á Almannaverkinum er flokkaður sum serfrøðingur III, heldur Fasti Gerðarrættur, at starvið hjá NN skal flokkast sum serfrøðingur III, stig 40. Starvsfelagið fær tí viðhald í hesum parti av málskravi sínum.


Aftur